बारा, १८ कात्तिक
बारा जिल्लामै सबै भन्दा भ्रष्ट मानिएको पालिका मध्ये एक फेटा गाउँपालिकाले शिक्षक काज सरुवाको नाममा समेत लाखौको भ्रष्टाचार गरेको प्रमाण फेला परेको छ । शिक्षा क्षेत्रमा राजनीति हस्तक्षेप गर्दै लाखौको रकम घुस खाने मेयर रुस्तम अंसारीको बिषय अहिले चर्चाको बिषय बन्न पुगेको छ । घुस खान कुनै सरकारी कार्यालय, कुनै नियम कानुन चाहिएको छैन, घुस पाए मनोमानी तरिकाले शिक्षक काज सरुवा गर्न पाइने भन्ने बिषय अहिले फेटा गाउँपालिका काण्डले चर्चा पाएको हो ।
एक जना शिक्षक श्रोतका अनुसार शिक्षा क्षेत्र दिन प्रति दिन खस्कीदै जानुमा भ्रष्ट मेयरको ठुलो हात रहेको बताएका छन । उनका अनुसार फेटा गाउँपालिकाका अध्यक्ष रुस्तम अंसारीले निर्वाचित भए दिनदेखि नै शिक्षा क्षेत्रलाई कमाई खाने भाडो बनाएको बताए । बालबालिकाको खाजादेखी लिएर शिक्षक काज सरुवाको नाममा लाखौको भ्रष्टाचार गर्दै आएको आरोप लगाए ।
अख्तियार दुरुपयोग अनुसन्धान आयोग टंगालमा परेको उजुरीलाई समेत अनादर गर्दै आफुलाई स्थानीय राजा ठान्दै मनोमानी तरिकाले काज सरुवा गरिएको श्रोतले दावी गरे । श्रोतका अनुसार अख्तियार दुरुपयोग अनुसन्धान आयोग टंगालले शिक्षा विकास तथा समन्वय इकाई कलैयालाई दिएको पत्रको अधारमा फेटा गाउपालिका, गाउँ कार्यपालिकाको कार्यालयलाई पत्र समेत पठाएको यस दैनिकले प्रमाण फेला पारेको छ ।
शिक्षा विकास तथा समन्वय इकाई कलैयाले सोधेको प्रश्न मिलान नभएको कारण काज सरुवामा समेत रोक लगाएतापनि मेयर रुस्तम अंसारीले केही कार्यन्वयन नगरेको र सोधिएको प्रश्नको जवाफ नै नदिई अटेरी गर्दै मनोमानी पाराले काज सरुवा गरेको पाइएको छ । फेटा गाउँपालिकामा पाच जना शिक्षक र कर्मचारीलाई आर्थिकको लोभमा काज सरुवा गरिएको व्यहोरा खुलेको छ ।
श्रोतले जनाए अनुसार फेटा गाउँपालिका वडा नम्बर ३ स्थित नेपाल राष्ट्रिय माध्यमिक विधालयबाट प्रधानाध्यापक पप्पु कुमार सिंहलाई वडा नम्बर ७ स्थित नेपाल राष्ट्रिय माध्यमिक विधालयमा काज सरुवा र सोही विधालयका प्रधानाध्यापक पानालाल बैठालाई वडा नम्बर ४ स्थित रहेको श्री अंचित माध्यमिक बिधालय बतरामा काज सरुवा गरेको बताए । त्यति मात्र नभई फेटा गाउभपालिका वडा नम्बर ४ स्थित रहेको अंचित माध्यमिक बिधालयको प्रधानाध्यापक अनिल कुमार गुप्तालाई सोही पालिकाको वडा नम्बर ३ स्थित रहेको नेपाल राष्ट्रिय माध्यमिक विधालयमा काज सरुवा गरेको र सोही विधालयको लेखापाल नवलकिसोर प्रसाद यादवलाई वडा नम्बर ४ स्थित अंचित माध्यमिक बिधालयमा काज सरुवा गरेको श्रोतले दावी गरे ।
फेटा गाउँपालिका वडा नम्बर ४ बतरा स्थित रहेको अंचित माध्यमिक बिधालयको लेखापाल परमहंस प्रसाद यादवलाई श्री नेपाल राष्ट्रिय माध्यमिक बिधालय फेटामा काज सरुवा गरिएको श्रोतले जनाएको छ । काज सरुवाको नाममा लाखौ रुपैया आम्दानी गर्न सफल भएका मेयर अंसारीले शिक्षा क्षेत्रलाई कमाई खाने थल्लोको रुपमा रुपापन्तरण गरेको शिक्षा विकास तथा समन्वय इकाई कलैयाको पत्रबाट सर्वविधितै छ ।
स्थानीय तहको निर्वाचनमा प्रमुख एजेन्डाको रुपमा बन्दै आएको शिक्षा क्षेत्र विकास भन्दा विनाशतर्फ धक्लीदै गएको यस घटनाले प्रष्ट पार्दछ । स्थानीय तहको निर्वाचनको समयमा शिक्षा क्षेत्रको बिषयलाई लिएर जनतालाई ठुलो ठुलो सपना देखाएका मेयर अंसारीले आर्थिकको अगाडी घुणा टेकेको समेत यस घटना पुष्टि गर्दछ । तसर्थः यस बिषयमा अख्तियार दुरुपयोग अनुसन्धान आयोग टंगालको यसतर्फ ध्यान पुग्न अति अवाश्यक रहेको देखिन्छ ।
