रौतहट , १७ पौष
नेपाल नेत्रज्योति सङ्घद्वारा सञ्चालित मधेश प्रदेशकै प्रतिष्ठित स्वास्थ्य संस्था गौर आँखा अस्पतालले बुधबार आफ्नो २९औँ वार्षिकोत्सव विभिन्न रचनात्मक कार्यक्रमका साथ भव्य रूपमा मनाएको छ। सन् १९९७ (वि.सं. २०५४) मा स्थापना भएको यस अस्पतालले रौतहट मात्र नभई छिमेकी जिल्लाहरू र सीमावर्ती भारतीय क्षेत्रका नागरिकलाई समेत सुलभ र गुणस्तरीय आँखा उपचार सेवा प्रदान गर्दै आएको हो ।
केक काटी वार्षिकोत्सवको सुरुवात
अस्पताल परिसरमा आयोजित औपचारिक कार्यक्रममा अस्पताल व्यवस्थापन समितिका पदाधिकारी, चिकित्सक, कर्मचारी र स्थानीय सरोकारवालाहरूको उल्लेख्य उपस्थिति थियो। कार्यक्रमको सुरुवातमा हर्षोल्लासका साथ केक काटी वार्षिकोत्सव मनाइएको थियो। बक्ताहरुले अस्पतालले विगत २८ वर्षदेखि अन्धोपन निवारणमा पुर्याएको योगदानको प्रशंसा गरेका थिए।
वार्षिकोत्सवलाई केवल उत्सवमा मात्र सीमित नराखी सेवाभावसँग जोड्दै अस्पताल प्रशासनले भर्ना भएका बिरामीहरूलाई फलफूल वितरण गरेको हो । अस्पतालमा उपचाररत बिरामीहरूको शीघ्र स्वास्थ्य लाभको कामना गर्दै अस्पताल परिवार र अतिथिहरूले बेड-बेडमा पुगेर फलफूल बाँडेका थिए। बिरामी र उनीहरूका आफन्तले अस्पतालको यो मानवीय कार्यप्रति खुसी व्यक्त गरे।
नेपाल नेत्रज्योति सङ्घ अन्तर्गत रहेर सेवा दिइरहेको यस अस्पतालले हालसम्म २० लाखभन्दा बढी व्यक्तिको आँखा जाँच र करिब २ लाख भन्दा बढीको सफल शल्यक्रिया गरिसकेको छ। तत्कालीन समाजसेवी र जापानी दातृ निकाय (AOCA) को सहयोगमा सुरु भएको यो अस्पताल आज १०० बेडको क्षमतामा विस्तारित भई ‘फेको’ जस्ता आधुनिक प्रविधिबाट मोतिबिन्दुको अपरेसन गर्न सफल भएको हो ।
अस्पताल प्रशासनको प्रतिबद्धता
कार्यक्रमलाई सम्बोधन गर्दै अस्पताल प्रशासनले आगामी दिनमा सेवाको दायरालाई अझै फराकिलो बनाउने र विपन्न वर्गलाई लक्षित गरी गाउँ-गाउँमा निःशुल्क आँखा शिविर सञ्चालन गर्ने प्रतिबद्धता जनाएको छ। अस्पतालका अनुसार, हाल गौर मुख्य अस्पतालका साथै चन्द्रनिगाहपुर, गरुडा, बंकुल र सर्लाहीको बरहथवामा रहेका आँखा उपचार केन्द्रहरू मार्फत पनि सेवा प्रवाह भइरहेको छ।
सौहार्दपूर्ण वातावरणमा सम्पन्न भएको यस कार्यक्रमले अस्पताल र समुदायबीचको सम्बन्धलाई थप प्रगाढ बनाएको र भविष्यमा यस क्षेत्रलाई ‘अन्धोपन मुक्त क्षेत्र’ बनाउने लक्ष्यमा टेवा पुग्ने विश्वास लिइएको हो ।
