बारा , २१ पौष
नेकपा एमालेका केन्द्रीय सदस्य ज्वाला शाहले आफूविरुद्ध पार्टी परित्याग गरेको भन्दै गलत र भ्रामक समाचार सम्प्रेषण गरिएकोप्रति कडा आपत्ति जनाएका छन्। उनले यस्ता निराधार, कपोलकल्पित तथा चरित्रहत्या गर्ने उद्देश्यले फैलाइएका समाचारप्रति गम्भीर ध्यानाकर्षण भएको भन्दै सम्बन्धित निकायलाई दोषीमाथि आवश्यक कारबाही गर्न आग्रह गरेका छन्।
नेता शाहले केही बदमास तत्वहरूले योजनाबद्ध रूपमा आफ्नो राजनीतिक छवि धूमिल पार्ने उद्देश्यले झुटा समाचार फैलाएको आरोप लगाए। “मैले पार्टी छोड्दैछु भन्ने कुरा पूर्ण रूपमा गलत, भ्रामक र आधारहीन हो। यस्ता हल्लाको कुनै सत्यता छैन,” उनले स्पष्ट शब्दमा भने।
उनका अनुसार सामाजिक सञ्जाल तथा केही अनलाइन माध्यममार्फत फैलाइएका यस्ता समाचारले न केवल व्यक्तिगत प्रतिष्ठामा आँच पुर्याएको छ, बरु पार्टीभित्र अनावश्यक भ्रम सिर्जना गर्ने प्रयाससमेत गरिएको छ। उनले नेकपा एमालेप्रति आफ्नो प्रतिबद्धता यथावत रहेको उल्लेख गर्दै पार्टी र नेतृत्वप्रति आफू पूर्ण रूपमा समर्पित रहेको बताए।
नेता शाहले आम जनता, पार्टी कार्यकर्ता तथा शुभेच्छुकहरूलाई यस्ता गलत र अपुष्ट समाचारमा विश्वास नगर्न आग्रह गरेका छन्। साथै, प्रेस स्वतन्त्रताको नाममा भ्रम फैलाउने र तथ्यविहीन सामग्री प्रकाशन–प्रसारण गर्नु लोकतन्त्र र पत्रकारिताको मूल मर्मविपरीत भएको उनको भनाइ छ।
“जिम्मेवार पत्रकारिता भनेको सत्यतथ्यको खोजी र निष्पक्ष समाचार सम्प्रेषण हो,” शाहले भने, “तर केही सञ्चारमाध्यम र व्यक्तिहरूले जिम्मेवारी बिर्सेर अफवाह फैलाउने काम गरेका छन्, जुन निन्दनीय छ।”
उनले सम्बन्धित नियामक निकाय, प्रेस काउन्सिल तथा कानुन कार्यान्वयन गर्ने निकायहरूलाई यस्ता भ्रामक समाचार फैलाउनेहरूमाथि छानबिन गरी कानुनी दायरामा ल्याउन आग्रह गरेका छन्। साथै, आगामी दिनमा सत्य, सन्तुलित र जिम्मेवार पत्रकारिताको अभ्यास गर्न सबै सञ्चारमाध्यमलाई आह्वानसमेत गरेका छन्।
