बारा , २६ पौष
बाराको नेपाली काँग्रेस जिल्ला कार्य समितिले पार्टीको इतिहासमा अत्यन्त महत्वपूर्ण मोडका रूपमा रहेको विशेष महाधिवेशन माघ २८ गते काठमाडौंमा आयोजना हुने जानकारी दिएको छ। जिल्ला समितिले पार्टीका प्रतिनिधि, सभासद सदस्य तथा पदाधिकारीहरुलाई यस महाधिवेशनमा सक्रिय उपस्थित भई योगदान गर्न हार्दिक अनुरोध गरेको छ।
पत्रमा उल्लेख छ कि नेपाली काँग्रेस केवल एउटा राजनीतिक संगठन मात्र नभई लोकतन्त्र, समावेशिता र राष्ट्रिय एकताका लागि अघि बढ्ने संस्था हो। ऐतिहासिक रूपमा यो महाधिवेशनले केवल औपचारिक उपस्थितिका लागि नभई पार्टीको भविष्य र राष्ट्रको दिशा निर्धारणमा प्रतिनिधिहरुले जिम्मेवारीपूर्वक सहभागी हुनुपर्ने बताइएको छ।
पत्रमा पार्टीको संगठनात्मक एकता, आन्तरिक लोकतन्त्र, वर्तमान राजनीतिक चुनौती र जनताको अपेक्षालाई मध्यनजर गर्दै नयाँ नेतृत्व निर्माण गर्न महाधिवेशनको महत्वप्रति जोड दिइएको छ। साथै, प्रतिनिधिहरुलाई पार्टीप्रति आस्था राख्दै सक्रिय रूपमा सहभागिता जनाउन आग्रह गरिएको छ।
सचिव राजेश रौनियार र भैराम प्रसाद यादवले प्रतिनिधिहरुको सहभागितामा जोड दिँदै महाधिवेशन सफल, ऐतिहासिक र सशक्त बनाउन सबैसँग सहकार्य गर्न अपील गरेका छन्।
पत्रको समापनमा सबै प्रतिनिधिहरुलाई पार्टीको भविष्य र लोकतन्त्रको रक्षा गर्ने उद्देश्यसहित महाधिवेशनमा उपस्थित हुने अनुरोध गरिएको छ।