कलैया , ०५ फागुन
नेपाल एमाले पार्टीबाट प्रतिनिधि सभा सदस्य पदका लागि उम्मेदवारी दिएकी पूर्व मन्त्री ज्वाला कुमारी साह मङ्गलबार कलैया उपमहानगरपालिका वडा नम्बर ९ र ११ मा घरदैलो कार्यक्रम सम्पन्न गरेकी छन्। उनी स्थानीय जनता भेट्न, उनीहरूको समस्या बुझ्न र आगामी निर्वाचनमा समर्थन जुटाउन घरदैलोमा सक्रिय रहेकी छिन्।
कार्यक्रमका क्रममा ज्वाला कुमारी साहले आफ्नो राजनीतिक यात्रा र अनुभवलाई साझा गर्दै, महिलाको अधिकार, मधेशी समुदायको विकास र जनताको समग्र हितमा आफू निरन्तर काम गर्दै आएको बताए। उनले भने, “जनताको आवाज सुन्नु मेरो प्राथमिकता हो। हरेक घरमा पुगेर उनीहरूको समस्या बुझ्ने प्रयासमै मेरो मुख्य ध्यान छ।”
वडा ९ मा आयोजित घरदैलोमा उनीसँग स्थानीयबासीहरू सक्रिय रूपमा सहभागी भए। बस्तीका महिलाहरूले रोजगारी, स्वास्थ्य सेवा र शिक्षा पहुँच बढाउने विषयमा प्रश्न राखेका थिए। ज्वालाले सबै समस्यालाई बुझेर प्रभावकारी समाधानका लागि तयारी गरिरहेको बताइन्।
त्यस्तै, वडा ११ मा भएको घरदैलोमा युवा र विद्यार्थीहरूले आफ्ना माग राखेका थिए। साहले युवाहरूलाई रोजगारी र उद्यमशीलता सम्बन्धी अवसर उपलब्ध गराउने प्रतिवद्धता व्यक्त गरेकी छिन्। उनले आगामी योजना र स्थानीय विकासका लागि पार्टीको नीति कार्यक्रम पनि प्रस्तुत गरेकी थिइन्।
कार्यक्रममा उपस्थित स्थानीय नेताहरूले ज्वालाको सक्रियता र जनता माझको पहुँचको प्रशंसा गर्दै, निर्वाचनमा जनसहभागिताको महत्व औँल्याए। साथै, उनले सबै उमेदवारहरूलाई शान्तिपूर्ण निर्वाचन अभियान सञ्चालन गर्न समेत आग्रह गरे।
ज्वाला कुमारी साहको यो घरदैलो अभियान आगामी निर्वाचन अघि मतदाता माझ पहुँच बढाउने रणनीतिक कदमको रुपमा हेरिएको छ। उनले हरेक वडामा घरदैलो गर्ने योजना अघि सार्दै जनताको साथ र विश्वास जित्ने प्रयासलाई निरन्तरता दिने बताइन्।
