माध्यमिक तथा निम्नमाध्यमिक तहमा अध्यापन हुने अंग्रेजी, गणित र विज्ञान विषयलाई विद्यार्थीहरूको शैक्षिक भविष्यको मेरुदण्ड मानिने गरिन्छ। तर ती विषय अध्यापन गराउने अधिकांश शिक्षकहरू संघीय अनुदान शिक्षण सहयोग कार्यक्रमअन्तर्गत कार्यरत रहँदै आएका छन्। लामो समयदेखि आफूहरू संघीय सरकारबाट उपेक्षित हुँदै आएको गुनासो गर्दै बाराका शिक्षकहरूले शनिबार जिल्लास्तरीय समिति गठन गरेका छन्।
बाराको प्रसिद्ध धार्मिक स्थल Gadhimai Temple परिसरमा आयोजित भेलाले सन्तोष कुमार जयसवालको अध्यक्षतामा “संघीय अनुदान शिक्षण सहयोग बारा” जिल्ला समिति गठन गरेको हो। कार्यक्रममा जिल्लाका विभिन्न विद्यालयमा कार्यरत माध्यमिक तथा निम्नमाध्यमिक तहका अंग्रेजी, गणित तथा विज्ञान विषयका शिक्षकहरूको उल्लेखनीय सहभागिता रहेको थियो।
भेलामा सहभागी शिक्षकहरूले संघीय अनुदानमा कार्यरत शिक्षकहरूको सेवा–सुविधा, पेशागत सुरक्षा, स्थायित्व तथा सम्मानजनक व्यवस्थापनको विषयमा सरकार गम्भीर बन्नुपर्ने माग गरेका थिए। उनीहरूले विद्यालय शिक्षाको गुणस्तर सुधारमा आफूहरूको महत्वपूर्ण योगदान हुँदाहुँदै पनि राज्यबाट उचित मूल्यांकन हुन नसकेको गुनासो गरे।
नवगठित समितिको अध्यक्षमा सन्तोष कुमार जयसवाल चयन भएका छन् भने वरिष्ठ उपाध्यक्षमा सुबोध पाण्डे र रवि चौरसिया चयन भएका छन्। त्यसैगरी सचिवमा राजेश चौधरी, सह–सचिवमा दीपेन्द्र प्रसाद साह र विवेक प्रसाद पटेल चयन भएका छन्। कोषाध्यक्षमा एकबालीशंकर प्रसाद साह तथा सह–कोषाध्यक्षमा राजेश्वर प्रसाद कुशवाहा चयन भएका छन्। समितिमा विभिन्न पालिकाबाट प्रतिनिधित्व हुने गरी २१ सदस्यीय जिल्ला समिति गठन गरिएको जनाइएको छ।
नवनिर्वाचित अध्यक्ष जयसवालले संघीय अनुदान शिक्षण सहयोगअन्तर्गत कार्यरत शिक्षकहरूको हकहित, पेशागत अधिकार तथा स्थायित्वका लागि जिल्लाबाट संगठित रूपमा आवाज उठाइने बताए। उनले शिक्षा क्षेत्रमा महत्वपूर्ण भूमिका निर्वाह गरिरहेका शिक्षकहरूलाई सरकारले बेवास्ता गर्न नहुने उल्लेख गर्दै आवश्यक परे चरणबद्ध आन्दोलनका कार्यक्रमसमेत अघि बढाइने चेतावनी दिए।
समितिले निकट भविष्यमै जिल्लाभरका शिक्षकहरूसँग समन्वय गरी साझा मागपत्र तयार पार्ने तथा सम्बन्धित निकायमा बुझाउने निर्णयसमेत गरेको जनाएको छ।
