पर्सा , १३ माघ
पर्सा जिल्लाको धोबिनी गाउँपालिका वडा नं. १ भिखमपुरस्थित नेपाल राष्ट्रिय माध्यमिक विद्यालयमा सोमबार दुई पक्षबीच झडप हुँदा दुई जना शिक्षकसहित पाँच जना घाइते भएका छन्।
प्राप्त जानकारी अनुसार घटना माघ ९ गते शुक्रबार सरस्वती पूजाको अवसरमा आयोजना गरिएको सांस्कृतिक कार्यक्रमसँग सम्बन्धित छ। पूजा व्यवस्थापन समिति र विद्यालय प्रशासनको सहमतिमा विद्यालय परिसरमै कार्यक्रम आयोजना गरिएको थियो। तर सो कार्यक्रममा सहभागी एक समूहको प्रस्तुति र केही गतिविधि आपत्तिजनक रहेको भन्दै स्थानीयले आपत्ति जनाएका थिए।
कार्यक्रमका केही दृश्यहरू सामाजिक सञ्जालमा सार्वजनिक भएपछि स्थानीय बासिन्दा र विद्यार्थीहरू आक्रोशित बनेका थिए। प्रत्यक्षदर्शीहरूले बताएअनुसार विद्यालय प्रशासनको लापरबाहीका कारण विवाद उत्पन्न भएको आरोप स्थानीयहरूले लगाएका थिए। विरोध उग्र हुँदै गएपछि झडपमा परिणत भएको हो।
झडपको क्रममा केही शिक्षकलाई कालो मोसो दलिएको र विद्यालय परिसरभित्र रहेका फर्निचरहरूमा तोडफोड भएको बताइएको छ। घाइतेहरूलाई तत्काल स्थानीय स्वास्थ्य संस्थामा उपचार गरिएको थियो र हाल उनीहरूको अवस्था सामान्य रहेको प्रहरीले जनाएको छ।
घटनापछि सुरक्षाकर्मी परिचालन गरी विद्यालय परिसरको अवस्था नियन्त्रणमा लिइएको छ। यस घटनाको छानबिन गर्न विद्यालय प्रशासन, स्थानीय प्रशासन र प्रहरी प्रशासनले संयुक्त रूपमा कदम चालेको छ।
स्थानीयवासी र विद्यालयले बताएका अनुसार यस घटनाले विद्यालयमा आयोजना हुने कार्यक्रमहरूको व्यवस्थापन, निगरानी र मर्यादामा गम्भीर प्रश्न उठाएको छ। साथै, धार्मिक तथा सांस्कृतिक कार्यक्रमको समयमा समुदायबीच सहिष्णुता र समझदारी कायम राख्न आवश्यक रहेको बताइएको छ।
प्रहरी र प्रशासनले भविष्यमा यस्ता घटनाहरू नदोहरिने सुनिश्चित गर्न उचित निगरानी र व्यवस्थापनको आवश्यकता औँल्याएका छन्।