कलैया , १७ माघ
बारा निर्वाचन क्षेत्र नम्बर–२ मा जनमत पार्टीका उम्मेदवार सिए राजेश साहले चुनावी गतिविधि तीव्र बनाएका छन्। उनले आफ्नो निर्वाचन क्षेत्रमा गाउँ–गाउँ पुगेर जनतासँग प्रत्यक्ष भेटघाट गर्दै सभा तथा अन्तरक्रिया कार्यक्रम सञ्चालन गरिरहेका छन्।
चुनावी अभियानअन्तर्गत साहले स्थानीय बासिन्दासँग प्रत्यक्ष संवाद गर्दै उनीहरूका समस्या, आवश्यकता र अपेक्षाबारे जानकारी लिइरहेका छन्। शिक्षा, स्वास्थ्य, रोजगारी, कृषि, सिँचाइ तथा आधारभूत पूर्वाधार विकासलाई प्रमुख प्राथमिकताका रूपमा अघि सारेका साहले बारा–२ लाई विकास र समृद्धिको बाटोमा अघि बढाउने प्रतिबद्धता जनाएका छन्।
विभिन्न स्थानमा आयोजित सभाहरूमा बोल्दै उम्मेदवार साहले बारा–२ मा विगतदेखि देखिँदै आएको बेरोजगारी, युवा पलायन र विकासको असमानताका विषय उठाएका छन्। उनले यी समस्याको दीर्घकालीन समाधानका लागि नीति, योजना र इमानदार नेतृत्व आवश्यक रहेको बताउँदै जनमत पार्टी त्यसकै लागि विकल्पका रूपमा अघि आएको दाबी गरे।
“अब पुरानो सोच र खाली नाराको राजनीति होइन, काम गरेर देखाउने समय आएको छ,” साहले भने, “जनताको आवाज संसदसम्म पुर्याउने र बारा–२ का समस्या राष्ट्रिय एजेन्डामा उठाउने मेरो प्रतिबद्धता हो।”
स्थानीयवासीहरूका अनुसार साहको अभियानमा युवाहरूको उल्लेख्य सहभागिता देखिएको छ। युवासँगको छलफलमा उनले सीपमूलक तालिम, स्वरोजगार कार्यक्रम र स्थानीय उत्पादनलाई प्रोत्साहन गर्ने योजनाबारे चर्चा गरेका थिए।
जनमत पार्टीका स्थानीय नेता तथा कार्यकर्ताहरूले पनि बारा–२ मा पार्टीप्रति जनचासो बढ्दै गएको दाबी गरेका छन्। उनीहरूका अनुसार प्रत्यक्ष भेटघाट र खुला संवादले जनतासँगको दूरी घटाएको छ र चुनावी माहोल सकारात्मक बन्दै गएको छ।
आगामी निर्वाचन नजिकिँदै जाँदा सिए राजेश साहले जनसम्पर्क अभियानलाई अझै तीव्र बनाउने जनाउँदै बारा–२ का हरेक टोल र बस्तीमा पुग्ने योजना रहेको बताएका छन्।