स्याउको कार्टुन भित्र आँप र लागुऔषध एम्पुल सहित दुई जना पक्राउ
शु.आ. सम्बाददाता
कलैया , ०७ साउन
स्याउको कार्टुन भित्र आँप र लागुऔषध एम्पुल सहित दुई जनालाई बारा प्रहरीले पक्राउ गरेको छ। पक्राउ पर्नेमा सर्लाही जिल्लाको रामनगर गाउँपालिका १ धुर्वा टोल बस्ने अन्दाजी वर्ष २० को राजेश गुप्ता र बाराको जीतपुर सिमरा उपमहानगरपालिका-७ खडका टोल बस्ने अन्दाजी वर्ष २४ को नसिर अंसारी रहेका छन्।
मँगलबार दिउँसो प्रहरी चौकी कचोर्वाबाट प्रहरी नायब निरीक्षक सोम प्रसाद रिमालको कमाण्डमा खटिएको प्रहरी टोलिले सिम्रौनगढ नगरपालिका -९ पिठवाबाट दुबै जनालाई लागुऔषध एम्पुल सहित पक्राउ गरेको छ।
भारतबाट नेपाल तर्फ गुप्ताले चलाई आउँदै गरेको ज ८ प ५४२१ नम्बरको मोटरसाईकल शंकास्पद लागी रोकी चेकजाँच गर्दा मोटरसाईकल पछाडी सवार अँसारीले बिचमा बोकेको स्याउको २ वटा कार्टुन भित्र आँप सहित लागुऔषध एम्पुल ४ हजार ८ सय पिस सहित पक्राउ गरीएको जिल्ला प्रहरी कार्यालय बाराले जानकारी दिएको छ।
प्रहरीको अनुसार उनीहरुबाट नोफिन एक हजार ६ सय पिस ,फेनारगन एक हजार ६ सय पिस र डाईजोपाम एक हजार ६ सय पिस गरी जम्मा ४ हजार ८ सय पिस बरामद गरीएको छ। मोटरसाइकल सहित दुबै जनालाई लागु औषध एम्पुल सहित नियन्त्रणमा लिई थप अनुसन्धान भइरहेको जानकारी प्रहरी प्रबक्ता एबम् प्रहरी नायव उपरीक्षक विजयराज पण्डितले दिएका छन्।