कलैया,२१ जेठ
मधेश प्रदेश सरकारका भौतिक पूर्वाधार विकास मन्त्री मोहम्मद समिर ले बारा जिल्लामा सञ्चालन भइरहेका विकास निर्माणका योजनालाई प्रभावकारी रूपमा अघि बढाउन विशेष सक्रियता देखाएका छन्। जिल्लामा पूर्वाधार विकास कार्यालय प्रमुखको पद लामो समयदेखि रिक्त रहँदा केही प्रशासनिक तथा प्राविधिक प्रक्रिया प्रभावित बनेको भए पनि मन्त्रालयले त्यसको समाधानलाई प्राथमिकतामा राखेर आवश्यक पहल अघि बढाएको जनाएको छ।
चालु आर्थिक वर्षमा बारा जिल्लाभित्र सडक, पुल, भवन तथा अन्य सार्वजनिक पूर्वाधार निर्माणसँग सम्बन्धित करिब १ अर्ब ३९ करोड रुपैयाँ बराबरका योजना सञ्चालनमा रहेका छन्। आर्थिक वर्ष समाप्त हुन केही सातामात्र बाँकी रहँदा ती योजनाको प्रगति, बजेट कार्यान्वयन र समयमै सम्पन्नताको विषयलाई लिएर मन्त्रालय थप सक्रिय बनेको हो। मन्त्री समिरले मन्त्रालयका उच्च अधिकारी तथा सम्बन्धित निकायलाई योजनाको नियमित अनुगमन, आवश्यक समन्वय तथा देखिएका समस्या तत्काल समाधान गर्न निर्देशन दिएका छन्।
पूर्वाधार विकास कार्यालयको नेतृत्व रिक्त हुँदा कतिपय फाइल प्रक्रिया, प्राविधिक निर्णय तथा प्रशासनिक कार्यमा ढिलाइ हुन सक्ने अवस्था देखिएपछि मन्त्रालयले कार्यालय प्रमुखको व्यवस्थापनका लागि आवश्यक प्रक्रिया अघि बढाएको स्रोतले जनाएको छ। स्थायी व्यवस्थापन नभएसम्म विकास निर्माणका कार्य अवरुद्ध हुन नदिन कार्यालयका अन्य जिम्मेवार कर्मचारीमार्फत नियमित सेवा प्रवाह र आवश्यक प्रशासनिक काम सञ्चालन भइरहेको बताइएको छ।
मन्त्री समिरले पदभार सम्हालेपछि प्रदेशभर विकास निर्माणका आयोजनालाई परिणाममुखी बनाउने, बजेट खर्चको दर वृद्धि गर्ने तथा नागरिकले प्रत्यक्ष लाभ पाउने योजनालाई प्राथमिकता दिने नीति अवलम्बन गर्दै आएका छन्। सोही नीतिअनुसार बारामा सञ्चालनमा रहेका योजनाको प्रगति समीक्षा, समस्या पहिचान तथा समाधानका लागि मन्त्रालयले विशेष ध्यान दिएको जनाइएको छ। मन्त्रालयका अधिकारीहरूका अनुसार कुनै पनि योजना नेतृत्व अभावका कारण प्रभावित नहोस् भन्ने उद्देश्यले आवश्यक समन्वय र सहजीकरणलाई तीव्रता दिइएको छ।
बाराका विभिन्न स्थानीय तहमा सडक स्तरोन्नति, पुल निर्माण, सरकारी भवन निर्माण तथा अन्य आधारभूत पूर्वाधारका आयोजना सञ्चालनमा छन्। यी आयोजनाको समयमै सम्पन्नताले स्थानीय नागरिकको आवागमन, सेवा पहुँच र आर्थिक गतिविधिमा सकारात्मक प्रभाव पर्ने अपेक्षा गरिएको छ। मन्त्रालयले असार मसान्तअघि सकेसम्म बढी योजनाको भौतिक तथा वित्तीय प्रगति सुनिश्चित गर्न सम्बन्धित कार्यालयहरूलाई सक्रिय बनाएको जनाएको छ।
स्थानीय जनप्रतिनिधि तथा सरोकारवालाहरूले पनि मन्त्री समिरले छोटो समयमै विकास निर्माणका विषयलाई प्राथमिकतामा राख्दै आवश्यक निर्णय प्रक्रिया अगाडि बढाएको बताएका छन्। उनीहरूका अनुसार बाराको विकासलाई गति दिन मन्त्रालयले देखाएको चासोले लामो समयदेखि अल्झिएका केही प्रशासनिक समस्या समाधान हुने विश्वास बढेको छ।
आर्थिक वर्षको अन्त्य नजिकिँदै जाँदा बजेट कार्यान्वयनको दबाब बढिरहेका बेला मन्त्रालयले विकास निर्माणका कामलाई प्रभावित हुन नदिने स्पष्ट प्रतिबद्धता जनाएको छ। कार्यालय प्रमुख व्यवस्थापनदेखि आयोजना कार्यान्वयनसम्मका विषयमा भइरहेको सक्रिय पहलले बाराका पूर्वाधार विकास योजनाले आगामी दिनमा थप गति लिने अपेक्षा गरिएको छ।
