कलैया, ११ माघ
बारा जिल्ला अदालत बार एशोसिएशनले सदस्य अधिवक्ता एकरामुल हकमाथि लागेको आरोपसँग सम्बन्धित घटनालाई लिएर सामाजिक सञ्जालमा फैलाइएका समाचारप्रति गम्भीर ध्यानाकर्षण जनाएको छ।
प्रेस विज्ञप्तिमा बार एशोसिएशनले भनेको छ कि, पिडितबाट जाहेरी दर्ता भइसकेको छ र अनुसन्धान भइरहेको अवस्थामा पूर्वधारणासहित आरोपीलाई दोषी ठहर गर्ने र सामाजिक सञ्जालमार्फत अमानवीय व्यवहार देखाउने कार्य कानूनको शासनको उपहास हो।
अधिवक्ता एकरामुल हकले पिडितको मुद्दामा कुनै अनैतिक कार्य नगरेको र घटना हनी ट्र्याप जस्तो पूर्व नियोजित योजना अन्तर्गत भएको बताएको बारले उल्लेख गरेको छ। प्रेस विज्ञप्तिमा पिडितलाई आवश्यक सहयोग उपलब्ध गराइने र अनुसन्धानले दोष प्रमाणित भएमा कानुन अनुसार कारबाही हुने स्पष्ट पारिएको छ।
बार एशोसिएशनले यस सम्बन्धमा सामूहिक हिंसा, भिडियो सार्वजनिक गर्ने र झुठा आरोप फैलाउने प्रयास गर्ने व्यक्तिहरूको पहिचान गरी कडा कानुनी कारबाही गर्न सम्बन्धित निकायमा माग गरेको छ।
यस विज्ञप्तिमा बार अध्यक्ष उपेन्द्र प्रसाद जयसवाल र सचिव समसुदिन हवारीको हस्ताक्षर रहेको छ।
