बारा , ११ पौष
जनमत पार्टीबाट प्रतिनिधि सभा सदस्यका उम्मेदवार प्रमोद गुप्ताको घरदैलो अभियान तीव्र रूपमा अगाडि बढिरहेको छ। शनिबार गुप्ताले बारा क्षेत्र नं. ३ अन्तर्गत वडा नं. १० र २० मा व्यापक घरदैलो कार्यक्रम सम्पन्न गरेका छन्।
घरदैलोका क्रममा गुप्ताले स्थानीय बासिन्दासँग प्रत्यक्ष भेटघाट गर्दै उनीहरूको समस्या, आवश्यकता र अपेक्षा सुनेका थिए। सडक, खानेपानी, शिक्षा, स्वास्थ्य, रोजगारी र किसानका मुद्दा प्रमुख प्राथमिकतामा रहेको बताउँदै उनले जितपछि ती विषयमा प्रभावकारी रूपमा काम गर्ने प्रतिबद्धता जनाए।
कार्यक्रममा सहभागी स्थानीय नागरिकहरूले विगतका प्रतिनिधिहरूबाट अपेक्षित काम हुन नसकेको गुनासो गर्दै यसपटक परिवर्तन आवश्यक रहेको धारणा राखेका थिए। उनीहरूले प्रमोद गुप्तालाई खुलेर साथ र सहयोग गर्ने प्रतिबद्धता जनाउँदै जनमत पार्टीप्रति विश्वास बढ्दै गएको संकेत दिएका छन्।
घरदैलो कार्यक्रममा युवाहरू, महिला तथा ज्येष्ठ नागरिकहरूको उल्लेखनीय उपस्थिति देखिएको थियो। विशेषगरी युवाहरूले रोजगारी र स्वरोजगारका योजनाबारे चासो व्यक्त गरेका थिए भने गुप्ताले स्थानीय स्रोत–साधनको उपयोग गर्दै रोजगार सिर्जना गर्ने योजना प्रस्तुत गरेका थिए।
स्थानीय राजनीतिक विश्लेषकहरूका अनुसार बारा–३ मा प्रमोद गुप्ताको घरदैलो अभियानले राम्रो गति लिएको छ। जनतासँगको प्रत्यक्ष संवाद, सरल प्रस्तुति र स्थानीय मुद्दामा केन्द्रित एजेन्डाका कारण उनको जितको सम्भावना बलियो बन्दै गएको अनुमान गरिएको छ।
आगामी दिनमा थप वडाहरूमा घरदैलो कार्यक्रमलाई निरन्तरता दिने जनमत पार्टीले जनाएको छ।
