कलैया, २४ भदौ
कलैया उपमहानगरपालिका–८ को नवनिर्मित वडा कार्यालय भवनको उद्घाटन गरिएको छ। बुधबार आयोजित एक समारोहबीच कलैया उपमहानगरपालिकाका नगर प्रमुख विनोद प्रसाद साहले रिबन काटेर वडा कार्यालय भवनको औपचारिक उद्घाटन गरेका हुन्।
नयाँ भवन निर्माण भएपछि वडा कार्यालयका सेवा प्रवाहलाई थप व्यवस्थित र सहज बनाउन सहयोग पुग्ने अपेक्षा गरिएको छ। स्थानीय तहबाट प्रवाह हुने प्रशासनिक तथा सिफारिसलगायतका सेवा सेवाग्राहीलाई सहज रूपमा उपलब्ध गराउन भौतिक पूर्वाधारको महत्वपूर्ण भूमिका रहने जनाइएको छ।
वडा अध्यक्ष रञ्जित चौरसियाका अनुसार भवन जिल्ला समन्वय समिति बारा, कलैया उपमहानगरपालिका तथा वडा नम्बर ८ को आर्थिक सहयोगमा निर्माण गरिएको हो। वडा कार्यालयका लागि आवश्यक भवन निर्माण गर्न स्थानीयस्तरबाट समेत महत्वपूर्ण सहयोग प्राप्त भएको उनले बताए।
भवन निर्माणका लागि कलैया–८ निवासी स्वर्गीय धनसुन्दर ठाकुर बढई तथा दुखनी देवी बढईनकी छोरी स्वर्गीय शुभरत्न श्रीवास्तवकी पत्नी तथा कवलकुमारीकी दिदी सुमित्रा कुमारीले ०–०–१५ धुर जग्गा उपलब्ध गराएकी थिइन्। सोही जग्गामा वडा कार्यालयको नवनिर्मित भवन निर्माण गरिएको वडा अध्यक्ष चौरसियाले जानकारी दिए।
जग्गा उपलब्ध गराउने सुमित्रा कुमारीप्रति वडा कार्यालयले धन्यवाद व्यक्त गरेको छ। सार्वजनिक प्रयोजनका लागि स्थानीयवासीबाट जग्गा सहयोग हुनु वडा कार्यालय निर्माणका लागि महत्वपूर्ण योगदान भएको बताइएको छ।
उद्घाटन समारोहमा कलैया उपमहानगरपालिकाका प्रमुख प्रशासकीय अधिकृत रेशमलाल कडेल, शिक्षा शाखा प्रमुख राजीवकुमार यादव, वडा नम्बर ६ का अध्यक्ष रामविश्वास ठाकुर, वडा नम्बर ११ का अध्यक्ष अजय कुशवाहा, वडा नम्बर २६ का अध्यक्ष धर्मेन्द्र यादव र वडा नम्बर २७ का अध्यक्ष अशोक तिवारीको उपस्थिति रहेको थियो।
त्यस्तै वडा नम्बर ८ का वडा सदस्यहरू राजिन्दर ठाकुर हजाम, तारा गिरी, मुख्तार अन्सारी र सनकेसिया देवी तथा वडा सचिव रामजी मण्डल महतोसहित उपमहानगरपालिकाका कर्मचारीहरूको समेत कार्यक्रममा सहभागिता रहेको थियो।
नवनिर्मित भवन सञ्चालनमा आएपछि वडा नम्बर ८ का नागरिकले वडा कार्यालयबाट प्राप्त गर्ने विभिन्न प्रशासनिक सेवा थप व्यवस्थित रूपमा पाउने विश्वास गरिएको छ। स्थानीय सरकारको सेवा नागरिकको नजिकबाट प्रभावकारी रूपमा प्रवाह गर्न वडा तहमा आवश्यक भौतिक संरचना निर्माणलाई महत्वपूर्ण मानिएको छ।
