सिम्रौनगढ २७, कार्तिक
ऐतिहासिक र धार्मिक महत्वको स्थल सिम्रौनगढस्थित रानीवास मन्दिर परिसरको जग्गा फेरि पनि अतिक्रमणको चपेटामा परेको छ। स्थानीय बासिन्दाहरूले गुठी संस्थान बीरगंज शाखाको उपेक्षा र लापरबाहीका कारण मन्दिरको जग्गामा पुनः निर्माण कार्य धमाधम भइरहेको बताएका छन्।
स्थानीयको अनुसार, केही व्यक्ति र समूहहरूले मन्दिरको आसपासको गुठी जग्गामा पर्खाल र पक्की संरचना निर्माण गर्न थालेका छन्। तर यसबारे गुठी संस्थान, नगरपालिका र प्रशासन मौन रहेको आरोप लगाइएको छ।
सिम्रौनगढको ऐतिहासिक रानीवास मन्दिर राजा हरिसिंहदेवको शासनकालदेखि नै धार्मिक–संस्कृतिक सम्पदाको केन्द्रका रूपमा परिचित छ। मन्दिरसँग जोडिएको जग्गा गुठी संस्थानको नाममा दर्ता भए पनि संरक्षण र निगरानी नहुँदा अतिक्रमणको जोखिम बढ्दै गएको हो।
स्थानीय समाजसेवी रामनाथ महतोका अनुसार, “गुठी संस्थानले वर्षौँदेखि मन्दिरको नाप–जाँच, सीमाङ्कन र संरक्षणमा कुनै पहल गरेको छैन। त्यसकै कारण आज धार्मिक सम्पदाको जग्गा निजी स्वार्थमा कब्जा गर्ने क्रम रोकिएको छैन।”
त्यस्तै, स्थानीय बासिन्दाहरूले गुठी संस्थान र स्थानीय प्रशासनलाई तत्काल अनधिकृत निर्माण रोक्न, अतिक्रमणको नक्सा सर्वजनिक गर्न र कानूनी कारबाही गर्न माग गरेका छन्।
यसैबीच, गुठी संस्थान बीरगंजका अधिकारीहरूले भने यस विषयमा मौखिक जानकारी पाएको बताउँदै भनेका छन् —“हामी टोली पठाएर यथार्थ बुझ्ने र जरुरी कदम चाल्ने तयारीमा छौँ।”
तर स्थानीयले भने पहिल्यै यस्ता आश्वासनहरू धेरै पटक सुनिएको तर व्यवहारमा कुनै ठोस कार्यवाही नदेखिएको गुनासो गरेका छन्।
सिम्रौनगढको रानीवास मन्दिर धार्मिक सम्पदामात्र नभई मधेश प्रदेशको ऐतिहासिक पहिचानसँग गाँसिएको प्रतीक भएकाले यसको जग्गा संरक्षणमा सबै निकायको तदारुकता अत्यावश्यक भएको सरोकारवालाहरूको मत छ।
Leave a Reply