सत्येन्द्र प्रताप सिंह
रौतहट, ०३ असोज
जिल्लाको सदरमुकाम गौरस्थित भन्सार कार्यालय अगाडिबाट सशस्त्र प्रहरीको संयुक्त टोलीले स्रोत नखुलेको साढे दुई लाखभन्दा बढी नेपाली नगदसहित दुई जनालाई नियन्त्रणमा लिएको छ।
गौर नगरपालिका–१ स्थित भन्सार कार्यालय अगाडि सीमा क्षेत्रमा तैनाथ संयुक्त चेकप्वाइन्ट टोलीले चेकजाँच गर्ने क्रममा भारतबाट नेपालतर्फ आउँदै गरेको बिआर ०६ एआर ०८०२ नम्बरको भारतीय मोटरसाइकलसहित उनीहरूलाई नियन्त्रणमा लिएको हो।
पक्राउ पर्नेहरूमा जिल्ला रौतहट माधवनारायण नगरपालिका–७ लौकाहा बस्ने अनुमानित २६ वर्षीय संजिव पण्डित र सोही ठाउँका अनुमानित १८ वर्षीय रितिक दास रहेका छन्।
भन्सार सुरक्षा गार्डका बरिष्ठ प्रहरी नायब निरीक्षक दीपक कुमार यादवको कमाण्डमा खटिएका ३ जना र सशस्त्र प्रहरी बल नेपाल सीमा सुरक्षा गुल्म हेडक्वार्टर गौरबाट सशस्त्र प्रहरी नायब उपरीक्षक दुर्गा प्रसाद भट्टको कमाण्डमा खटिएका ७ जना गरी कुल १० जनाको संयुक्त टोलीले शंकास्पद रूपमा आउँदै गरेको उक्त मोटरसाइकललाई रोकेर तलासी लिएको थियो।
तलासीका क्रममा उनीहरूको साथबाट स्रोत नखुलेको नेपाली नगद रु. २ लाख ५४ हजार फेला परेको हो। साथै उनीहरूको कब्जाबाट चाँदी जस्तो देखिने २ थान पायल २ थान मोबाइल फोन र सवारी साधनका रूपमा प्रयोग गरिएको उक्त मोटरसाइकलसमेत बरामद गरिएको छ।
बरामद रकमको वैधानिक स्रोत खुलाउन नसकेपछि नगद, चाँदी जस्ता सामान, मोबाइल र मोटरसाइकलसहित दुवै जनालाई नियन्त्रणमा लिई आवश्यक कानुनी कारबाहीका लागि रौतहट भन्सार कार्यालय गौरमा बुझाइएको सशस्त्र प्रहरीले जनाए ।
सीमा क्षेत्रमा हुनसक्ने अवैध कारोबार, हुण्डी तथा राजस्व छली नियन्त्रणका लागि सशस्त्र प्रहरीले चेकजाँचमा थप कडाइ गर्दै आएको छ।
