सत्येन्द्र प्रताप सिंह
रौतहट, १२ साउन
जिल्लाको मध्यभागमा अवस्थित गरुडा नगरपालिकाबाट हराइरहेका १० वर्षीय बालक छिमेकी पालिका माधवनारायणस्थित नहरको कलभर्ट मुनि मृत अवस्थामा फेला परेका छन्।
मृतक गरुडा नगरपालिका वडा नम्बर १ बस्ने शेख मंजरका १० वर्षीय छोरा शेख रिजवान आइतबार साउन ११ गते दिउँसो मृत अवस्थामा फेला परेका हुन्।
प्रहरीका अनुसार बालक रिजवान साउन १० गते शनिबार बेलुकी करिब ६:०० बजेको समयमा कसैलाई केही नभनी घरबाट निस्किएका थिए। अबोध बालक अबेरसम्म पनि घर नफर्किएपछि आफन्त तथा छरछिमेकले सम्भावित सबै स्थानमा खोजी गर्दा पनि कुनै पत्तो पाउन सकेका थिएनन्।
बालक फेला नपरेपछि चिन्तित बनेका बुवा शेख मंजरले साउन ११ गते आइतबार दिउँसो २ बजे इलाका प्रहरी कार्यालय शिवनगरमा बालकको हुलियासहित खोजतलासका लागि लिखित निवेदन दिएका थिए।
निवेदन परेको आधा घण्टा नबित्दै दिउँसो साढे २ बजेको समयमा माधवनारायण नगरपालिका वडा नम्बर ३ सखुवास्थित नहरको कलभर्ट मुनि पानीमा घोप्टो परेको अवस्थामा बालकको शव तैरिरहेको स्थानीयले देखिएका थिए। स्थानीयले तत्कालै प्रहरीलाई खबर गरेपछि घटनास्थलमा सन्नाटा छाएको थियो।
घटनाको गम्भीरतालाई ध्यानमा राख्दै इलाका प्रहरी कार्यालय गरुडाका प्रहरी नायव उपरीक्षक शंकर प्रसाद आचार्यको कमाण्डमा जुनियर अधिकृत प्राविधिक टोली तथा अपराध दृश्य अनुसन्धानको टोली स्थलगत अनुसन्धानका लागि खटिएको थियो।
अनुसन्धान टोलीले घटनास्थलको सुक्ष्म निरीक्षण गरी अपराह्न ३:४५ बजे मुचुल्कासहितका सम्पूर्ण कानुनी प्रक्रिया पूरा गरेको प्रहरीले जनाए । शवको वस्तुस्थितिको वस्तुपरक अध्ययन र पोष्टमार्टमका लागि जिल्ला अस्पताल गौर पठाइएको छ।
बालकको मृत्यु पछाडिको वास्तविक कारण के हो—दुर्घटना वा कुनै आपराधिक घटना भन्नेबारे पोष्टमार्टम रिपोर्ट आएपछि मात्र स्पष्ट हुने प्रहरीले बताए । घटनाबारे विभिन्न कोणबाट अनुसन्धान प्रक्रिया तीव्र पारिएको इलाका प्रहरी कार्यालय गरुडाले जनाए ।
