सत्येन्द्र प्रताप सिंह
रौतहट, ०८ साउन
रौतहटको गुजरा नगरपालिका–५ स्थित हरिहरपुर टोलमा बिहीबार बिहान धारिलो हतियार प्रहार गरी एक महिलाको हत्या गरिएको छ।
गुजरा नगरपालिका–५ हरिहरपुर टोल बस्ने चन्देशवर साह कलवारकी श्रीमती अन्दाजी ४०/४५ वर्षीया रेनु देवी जयसवालको खुकुरी प्रहार गरी बीभत्स हत्या गरिएको हो।
प्रहरीका अनुसार बिहीबार बिहान करिब १०:३० बजेको समयमा सोही स्थानमा बस्दै आएका एक पुरुषले रेनु देवीमाथि अचानक खुकुरी प्रहार गरेका थिए। हत्या आरोपमा बारा जिल्लाको करैयामाई गाउँपालिका वडा नं. ८ ईटहर बेलाही टोल घर भई हाल गुजरा–५ हरिहरपुर टोलमै बस्दै आएका अन्दाजी ३५ वर्षीय उपेन्द्र साह कलवार संलग्न रहेको प्रहरी चौकी हरिनगरले जनाए ।
आरोपी उपेन्द्र साहले रेनु देवीको घाटीमा धारिलो हतियार खुकुरी प्रहार गर्दा उनको घटनास्थलमै मृत्यु भएको हो। घटना पश्चात् रेनु देवीको शव रगताम्मे अवस्थामा घटनास्थलमै रहेको थियो।
महिलामाथि खुकुरी प्रहार गरी हत्या गरेलगत्तै आक्रोशित बनेका स्थानीयवासीले आरोपी उपेन्द्र साह कलवारलाई नियन्त्रणमा लिएर कुटपित गरेका छन्।
स्थानीयको कुटाइबाट गम्भीर घाइते भएका उपेन्द्र साहको उपचारका लागि चन्द्रनिगाहपुरस्थित चन्द्रपुर हस्पिटल लगिएको र उनको अवस्था चिन्ताजनक रहेको प्रहरीले जनाए ।
घटनाबारे जानकारी पाउनासाथ इलाका प्रहरी कार्यालय लक्ष्मीनिया विजयपुर, रौतहटबाट प्रहरी निरीक्षक रादेश कुमार खत्रीको कमाण्डमा प्रहरी टोली र प्रहरी चौकी हरिनगरको टोली घटनास्थल पुगेको छ।
प्रहरीले घटनास्थललाई आफ्नो नियन्त्रणमा लिई मृतकको शव परीक्षण तथा अन्य आवश्यक कानुनी प्रक्रिया अगाडि बढाएको छ। उपेन्द्र साहले कुन कारणले महिलामाथि खुकुरी प्रहार गरेका हुन् भन्नेबारे अहिलेसम्म खुल्न नसकेको र घटनाको विषयमा थप सूक्ष्म अनुसन्धान भइरहेको प्रहरी निरीक्षक खत्रीले जनाए।
