बारा , ०६ भदौ
मधेश प्रदेशका मुख्यमन्त्री कृष्णप्रसाद यादव धार्मिक प्रयोजनका लागि नेपालबाहिर जाने भएपछि भौतिक पूर्वाधार विकासमन्त्री मोहम्मद समीरलाई कार्यवाहक मुख्यमन्त्रीको जिम्मेवारी दिइएको छ।
मुख्यमन्त्री तथा मन्त्रिपरिषद्को कार्यालय, मधेश प्रदेशले २०८३ भदौ ५ गते जारी गरेको पत्रअनुसार मुख्यमन्त्री यादवको अनुपस्थितिमा मन्त्री समीरले कार्यवाहक मुख्यमन्त्रीका रूपमा जिम्मेवारी सम्हाल्नेछन्।
मुख्यमन्त्री यादवले धार्मिक प्रयोजनका लागि नेपालबाहिर जानुपर्ने भएकाले भदौ ६ गतेदेखि आफू नेपाल फर्किएर नआउन्जेलसम्मका लागि समीरलाई कार्यवाहक मुख्यमन्त्री तोकेको पत्रमा उल्लेख छ।
मधेश प्रदेश सरकार (कार्यसम्पादन) नियमावली, २०८० को नियम १४ को उपनियम (३) बमोजिम समीरलाई कार्यवाहक मुख्यमन्त्रीको जिम्मेवारी दिइएको हो।
मुख्यमन्त्रीको अनुपस्थितिमा प्रदेश सरकारका नियमित प्रशासनिक तथा कार्यकारी कामकारबाहीलाई निरन्तरता दिने जिम्मेवारी समीरले सम्हाल्नेछन्। कार्यवाहकको जिम्मेवारी मुख्यमन्त्री यादव नेपाल नफर्किएसम्म कायम रहने जनाइएको छ।
मुख्यमन्त्री तथा मन्त्रिपरिषद्को कार्यालयले कार्यवाहक मुख्यमन्त्री तोकिएको पत्रको बोधार्थ मधेश प्रदेशका प्रदेश प्रमुखको कार्यालयलाई समेत पठाएको छ।
मुख्यमन्त्री यादवको विदेश भ्रमण धार्मिक प्रयोजनका लागि हुने उल्लेख भए पनि भ्रमणको गन्तव्य, अवधि र धार्मिक कार्यक्रमबारे पत्रमा थप विवरण खुलाइएको छैन।
मुख्यमन्त्री कार्यालयबाट जारी पत्रको चलानी नम्बर ३९ रहेको छ भने पत्रमा २०८३/०५/०५ मिति उल्लेख गरिएको छ। समीर हाल मधेश प्रदेश सरकारका भौतिक पूर्वाधार विकासमन्त्रीका रूपमा कार्यरत छन्।
