कलैया , ०६ भदौ
बारा जिल्लाको कलैयामा Web Surfer Internet को नाममा सञ्चालन भइरहेको इन्टरनेट सेवाको ग्राहक सेवा, प्राविधिक व्यवस्थापन र स्थानीय सेवा सञ्चालनको आधिकारिकतामाथि उपभोक्ताले गम्भीर प्रश्न उठाएका छन्।
इन्टरनेट सेवा लिएबापत ग्राहकबाट नियमित रूपमा शुल्क असुल गरिए पनि सेवा अवरुद्ध हुँदा तत्काल प्राविधिक सहयोग नपाउने, सम्बन्धित प्राविधिकसँग सम्पर्क गर्नै कठिन हुने र सामान्य समस्या समाधानका लागि समेत पटक–पटक फोन गर्नुपर्ने अवस्था रहेको उपभोक्ताहरूको गुनासो छ।
स्थानीय ग्राहकका अनुसार इन्टरनेट अवरुद्ध भएपछि कलैयामा सेवा हेर्ने भनिएका प्राविधिकको मोबाइल नम्बरमा दिनभरि पटक–पटक सम्पर्क गर्दा समेत फोन नलाग्ने तथा समस्या समाधानका लागि प्राविधिक टोली समयमा नपुग्ने गरेको छ। इन्टरनेटमा निर्भर व्यवसाय, कार्यालय तथा विद्यार्थीहरूलाई यस्तो अवस्थाले प्रत्यक्ष असर पारिरहेको उनीहरूको भनाइ छ।
झन् गम्भीर प्रश्न भने कम्पनीको केन्द्रीय कार्यालयबाट प्राप्त भनिएको जवाफले उठाएको छ। उपभोक्ताका अनुसार केन्द्रीय कार्यालयमा सम्पर्क गर्दा ‘हामी reseller गर्दैनौँ’ भन्ने जवाफ दिइएको थियो। यदि कम्पनीले reseller मार्फत सेवा सञ्चालन नगर्ने हो भने कलैयामा कम्पनीकै नाममा सेवा कसले, कुन संरचनाअन्तर्गत र कुन आधिकारिकताका आधारमा सञ्चालन गरिरहेको छ भन्ने विषयमा स्पष्टता आवश्यक देखिएको छ।
उपभोक्ताहरूले कम्पनीको केन्द्रीय कार्यालय र कलैयामा सेवा उपलब्ध गराउने पक्षबीचको सम्बन्धबारे सार्वजनिक जानकारी मागेका छन्। स्थानीय सेवा प्रदायक वा प्राविधिक संरचना कम्पनीकै आधिकारिक संयन्त्र हो कि होइन, ग्राहकबाट उठाइएको शुल्क कहाँ र कसरी व्यवस्थापन हुन्छ तथा सेवा अवरुद्ध हुँदा क्षतिपूर्तिसहितको ग्राहक सेवा प्रणाली के छ भन्ने प्रश्नसमेत उठेको छ।
इन्टरनेट सेवा आजको समयमा विलासिता नभई दैनिक कामकाज, शिक्षा, व्यवसाय र सञ्चारको आधारभूत आवश्यकता बनिसकेको अवस्थामा शुल्क लिएर सेवा उपलब्ध गराउने कम्पनीले ग्राहकको समस्यालाई बेवास्ता गर्न नहुने उपभोक्ताहरूको भनाइ छ।
उपभोक्ताले Web Surfer सँग कलैयामा सेवा सञ्चालनको आधिकारिकता, स्थानीय प्राविधिकको जिम्मेवारी, ग्राहक सेवा संयन्त्र र शुल्क व्यवस्थापनबारे स्पष्ट धारणा सार्वजनिक गर्न माग गरेका छन्। साथै, सेवा अवरुद्ध हुँदा तत्काल प्राविधिक टोली परिचालन हुने भरपर्दो प्रणाली निर्माण गर्न उनीहरूले आग्रह गरेका छन्।
यता, कम्पनीको पक्षसमेत लिएर आरोपको आधिकारिक पुष्टि तथा स्थानीय सेवा सञ्चालनको वास्तविक संरचना स्पष्ट पारिनुपर्ने देखिएको छ। उपभोक्ताका गुनासामाथि कम्पनीले जवाफ नदिएसम्म ‘नियमित शुल्क असुली, तर अवरुद्ध सेवामा बेवास्ता’ भन्ने प्रश्न थप गम्भीर बन्ने देखिन्छ।
स्थानीय उपभोक्ताहरूले सम्बन्धित नियामक निकायले समेत सेवा प्रदायकको आधिकारिकता, ग्राहक सेवा र सेवा गुणस्तरबारे आवश्यक अनुगमन गर्नुपर्ने माग गरेका छन्।
