बारा , १७ माघ
निर्वाचन आयोग, नेपालअन्तर्गत जिल्ला निर्वाचन कार्यालय बाराले प्रतिनिधि सभा सदस्य निर्वाचन–२०८२ का लागि बाराको निर्वाचन क्षेत्रअनुसार मतदाता संख्याको विवरण सार्वजनिक गरेको छ। सार्वजनिक तथ्यांकअनुसार बारामा कुल ४ लाख ५६ हजार ५८४ जना मतदाता रहेका छन्।
कार्यालयका अनुसार जिल्लामा महिला मतदाता २ लाख १० हजार ००९, पुरुष मतदाता २ लाख ४५ हजार ५६३ र तेस्रो लिङ्गका १२ जना मतदाता दर्ता भएका छन्। निर्वाचन प्रयोजनका लागि जिल्लाभर ३०२ मतदान स्थल र ५८७ मतदान केन्द्र कायम गरिएको छ।
निर्वाचन क्षेत्रगत अवस्था
निर्वाचन क्षेत्र नं. १ मा महिला ५७ हजार ५८५, पुरुष ६६ हजार ७२३ र तेस्रो लिङ्ग ४ जना गरी जम्मा १ लाख २३ हजार ६५२ मतदाता छन्। यस क्षेत्रमा ७६ मतदान स्थल र १५१ मतदान केन्द्र तोकिएका छन्।
निर्वाचन क्षेत्र नं. २ मा महिला ४९ हजार ८४५ र पुरुष ६३ हजार ९९४ गरी जम्मा १ लाख १३ हजार ८३९ मतदाता रहेका छन्। यहाँ ८२ मतदान स्थल र १४५ मतदान केन्द्र कायम गरिएको छ।
निर्वाचन क्षेत्र नं. ३ मा महिला ५१ हजार ६६६, पुरुष ६३ हजार ५४३ र तेस्रो लिङ्ग २ जना गरी जम्मा १ लाख १५ हजार २११ मतदाता छन्। यस क्षेत्रमा ७६ मतदान स्थल र १४४ मतदान केन्द्र रहेका छन्।
निर्वाचन क्षेत्र नं. ४ मा महिला ५१ हजार ८४०, पुरुष ६२ हजार ०९३ र तेस्रो लिङ्ग ६ जना गरी जम्मा १ लाख १४ हजार ५२९ मतदाता रहेका छन्। यहाँ ६९ मतदान स्थल र १३७ मतदान केन्द्र तोकिएका छन्।
तयारी तीव्र
जिल्ला निर्वाचन कार्यालय बाराले निर्वाचनलाई स्वच्छ, निष्पक्ष र मर्यादित बनाउन मतदाता नामावली अद्यावधिक, मतदान स्थल व्यवस्थापन, कर्मचारी परिचालन तथा सुरक्षा समन्वयको कामलाई तीव्र बनाएको जनाएको छ। आयोगले सबै मतदातालाई निर्भीक रूपमा मतदान प्रक्रियामा सहभागी हुन आग्रह गरेको छ।
