सत्येन्द्र प्रताप सिंह
रौतहट , ०३ असोज
जिल्लाको मध्यभागमा अवस्थित गरुडा नगरपालिका–७ भिमडावरमा एकै रात तीन वटा घरमा चोरी भएको छ। घटनाको अनुसन्धानका क्रममा प्रहरीले एक थान लोडेड कटुवा पेस्तोल बरामद गरेको छ।
शुक्रबार बिहान करिब ९:३० बजेको समयमा गरुडा नगरपालिका–७ भिमडावर निवासी दयाराम साहको एकतल्ले पक्की घरको पछाडिको ढोकाको आग्लो भाँचेर अज्ञात समूह घरभित्र प्रवेश गरेको थियो। चोरहरूले घरमा रहेका रेडमी, ओपो र रियलमी कम्पनीका गरी तीन थान मोबाइल चोरी गरेका थिए।
त्यसैगरी सोही स्थानका मनोज साहको एकतल्ले पक्की घरको छतको ढोकाबाट प्रवेश गरी कोठाको आग्लो निकालेर दराजमा राखिएको पर्सबाट नगद करिब ५ हजार रुपैयाँ चोरी भएको छ।
साथै सोही बस्तीका रामाज्ञा साहको एकतल्ले पक्की घरको माथिल्लो ढोकाबाट घरभित्र छिरेका चोरहरूले कोठामा रहेको टिनको बाकसभित्रको पर्सबाट ८ हजार रुपैयाँ नगद र एक थान भिभो मोबाइल चोरी गरी फरार भएका थिए।
एउटै गाउँका तीन घरमा श्रृंखलाबद्ध चोरी भएको खबर प्राप्त हुनासाथ इलाका प्रहरी कार्यालय गरुडाबाट प्रहरी निरीक्षकको कमाण्डमा प्रहरी टोली घटनास्थल पुगेको थियो।
घटनास्थलको अनुसन्धान तथा खानतलासी गर्ने क्रममा प्रहरीले दयाराम साहको खपडाको छानो भएको भुईघरको बरण्डामा रहेको खाटमा १ थान लाइभ राउण्ड (गोली लोड गरिएको) कटुवा पेस्तोल फेला पारेको छ।
उक्त हतियार बरामद गरी प्रहरीले कब्जामा लिएको छ। चोरीमा संलग्न गिरोहको खोजी कार्य तीव्रताका साथ अघि बढाउनुका साथै बरामद हतियारबारे थप सूक्ष्म अनुसन्धान भइरहेको इलाका प्रहरी कार्यालय गरुडाले जनाए ।
